Sony PlayStation Plus-т Xbox Game Pass загварын цоо шинэ "Perks" урамшууллын хөтөлбөр нэвтрүүллээ

PlayStation брэндийн захиалгат үйлчилгээ болох PlayStation Plus сүүлийн үеийн томоохон өөрчлөлтөө хийлээ. Sony компани өрсөлдөгч Xbox Game Pass-ийн олон жил амжилттай хэрэгжүүлж буй "Perks" тогтолцоотой ижил төстэй шинэ урамшууллын хөтөлбөрийг PS Plus гишүүдэд албан ёсоор нээж өглөө. Ингэснээр гишүүд зөвхөн сар бүрийн үнэгүй тоглоом татаж авах бус, олон төрлийн дижитал үйлчилгээ, төхөөрөмжийн хөнгөлөлтүүдийг давхар эдлэх боломж бүрдэж байна.

PlayStation Plus гишүүдэд ямар давуу талууд нээгдэв?

Энэхүү шинэ хөтөлбөр нь PlayStation Plus-ийн бүх гурван шатлалд (Essential, Extra, Premium/Deluxe) нэгэн зэрэг хамаарах бөгөөд гишүүд өөрийн PlayStation Network (PSN) аккаунтаар нэвтрэн дараах 7 гол урамшууллыг авах боломжтой болжээ:

• YouTube Premium-ийн 3 сарын эрх: Зар сурталчилгаагүй видео үзэх, YouTube Music ашиглах эрхийг шинэ хэрэглэгчдэд үнэгүй олгоно.
• Calm аппликейшны 2 сарын эрх: Стресс тайлах, нойр сайжруулах дэлхийн шилдэг бясалгалын аппликейшны Premium эрх.
• Sony Pictures Core кино кредит: Sony-ийн тусгай кино сангийн тодорхой бүтээлүүдийг үнэгүй үзэх эрх.
• Audible сонсдог номын тусгай үнэ: Эхний гурван сарын турш сард ердөө 0.99 фунт/еврогоор ашиглах боломж.
• DAZN Ultimate спорт стриминг: Сарын захиалгын төлбөрөөс 20%-ийн шууд хөнгөлөлт.
• PlayStation Direct дэлгүүрийн 5%-ийн хямдрал: Албан ёсны онлайн дэлгүүрээс бүтээгдэхүүн авахад 5% хэмнэнэ.
• DualSense болон ауди төхөөрөмжийн онцгой үнэ: Сонгогдсон DualSense удирдлагаас 10 фунт/евро хөнгөлөх, Sony Electronics-ийн тоглоомын чанга яригч, чихэвчүүдээс 10% хасах боломж.

Sony-ийн зүгээс эдгээр саналууд тогтмол шинэчлэгдэж, цаашид илүү олон шинэ түншүүдийн давуу талууд нэмэгдэнэ гэдгийг онцолсон байна.

Gamer-уудын дунд үүссэн шүүмжлэл, маргаан

Шинэ Perks хөтөлбөр цаасан дээр дажгүй сонсогдож байгаа ч олон улсын тоглоомын нийгэмлэг, Reddit болон сошиал орчинд шүүмжлэл дагуулаад амжив. Тоглогчдын дургүйцлийг хүргэж буй хэд хэдэн хүчин зүйл байна:

1. Бүс нутгийн хатуу хязгаарлалт: Эхний ээлжид эдгээр perks нь зөвхөн Их Британи, Герман, Франц зэрэг Европын гурван улсын бүртгэлтэй PSN аккаунтад л ажиллаж байна. Бусад бүсүүдэд хэзээ нээгдэх талаар тодорхой хугацаа заагаагүй нь дэлхийн бусад улсын хэрэглэгчдийг гонсойлгоод байна.
2. "Үнэгүй туршилт"-ын арга барил: Ихэнх урамшуулал нь бодит үнэ төлбөргүй контент гэхээсээ илүү картын мэдээллээ оруулж, хугацаа нь дуусмагц төлбөр суутгах эрсдэлтэй "Free Trial" хэлбэртэй байгааг тоглогчид шүүмжилж байна.
3. Үнийн өсөлтийн болгоомжлол: Сүүлийн жилд захиалгын суурь үнэ нэмэгдсэн тул gamer-ууд Sony-г тоглоомтой хамааралгүй төрөл бүрийн үйлчилгээний нэрээр PS Plus-ийнхээ үнийг цаашид дахин өсгөх шалтаг хайж байна гэж болгоомжилж байгаа юм.

Гэсэн хэдий ч Sony компанийн зүгээс PlayStation Plus-ийг зөвхөн консолын онлайн эрх төдий бус, хэрэглэгчийн амьдралын өдөр тутмын энтертайнмент хэрэгцээг хангах цогц экосистем болгон тэлэхийг эрмэлзэж буй нь тодорхой харагдаж байна.

Эх сурвалж: Push Square, IGN, PlayStation UK