Хоёр жилийн дараах эргэн ирэлт: MOUZ дэлхийн чансааны №1 байранд бичигдэж эхэллээ
CS2-ийн ертөнцөд ноёрхлын эрэмбэ дахин солигдлоо. Бээжин хотноо өндөрлөсөн $1,250,000 ам.долларын шагналын сантай IEM Beijing 2026 тэмцээнд өрсөлдөгчдөө илт илүүрхэн түрүүлсэн Европын хүчирхэг баг MOUZ албан ёсоор дэлхийн чансааны №1 баг болсноо зарлалаа.
HLTV-ээс долоо хоног бүр шинэчлэн гаргадаг албан ёсны дэлхийн чансааны шинэ хүснэгтэд MOUZ тэргүүн эгнээнд бичигдэж, FURIA, Team Vitality болон Team Spirit багуудыг ардаа орхисон байна.
Хоёр жилийн дараа дэлхийн оргилд дахин гарлаа
MOUZ баг хамгийн сүүлд 2024 оны 6-р сард дэлхийн чансааг тэргүүлж байсан билээ. Тэр цагаас хойш бүрэлдэхүүндээ томоохон өөрчлөлт хийж, бүтээн байгуулалтын шатыг туулсан тэд хоёр жил гаруйн хугацааны дараа эргэн оргилд гарч байна.
Хамгийн онцлог нь тэд зөвхөн HLTV төдийгүй Valve-ийн албан ёсны бүсийн чансаа болох VRS (Valve Regional Standings)-ийг ч давхар тэргүүлж эхэлсэн явдал юм. Ингэснээр MOUZ баг CS2-ийн мэргэжлийн түвшний хоёр гол чансааны хоёуланд нь зэрэг №1 болж чадлаа.
Энэ улиралд MOUZ үнэхээр гайхалтай тогтвортой тоглолтыг үзүүлж байгаа бөгөөд 8-р сард BLAST Bounty Season 2-т түрүүлж, BLAST Open Porto болон ESL Pro League Season 24 тэмцээнүүдэд финалд шалгаран дэд байр, харин PGL Masters Bucharest тэмцээнд хүрэл медаль хүртээд байсан юм. Харин IEM Beijing 2026 тэмцээнд бүхэл бүтэн тэмцээний турш ганц ч map алдалгүй (11-0) төгс түрүүлсэн нь тэдэнд чансааны тэргүүн байрыг баттай авчирлаа.
xertioN-ий удирдлага ба шинэ эрин үе
MOUZ-ийн 2024 оны бүрэлдэхүүнээс өдгөө багтаа үлдсэн хоёрхон тоглогч нь снайпер Ádám "torzsi" Torzsás болон шинэ IGL (In-Game Leader) Dorian "xertioN" Berman нар юм.
Дасгалжуулагч Dennis "sycrone" Nielsen багийнхаа нээлтийн гол тоглогч байсан 22 настай xertioN-д ахлагчийн үүргийг даалгасан нь эрсдэлтэй шийдвэр мэт санагдаж байсан ч бодит амьдрал дээр төгс хэрэгжлээ. Бээжингийн тэмцээнд xertioN өөрөө галзуу тоглолт үзүүлж, плей-оффт 1.53 үнэлгээ авснаар карьерынхаа анхны MVP медалиа гардан авсан төдийгүй, 2019 оны gla1ve-ээс хойш Big Event-ийн MVP авсан анхны rifling IGL болон түүхэнд бичигдээд байна.
Түүнчлэн Lotan "Spinx" Giladi болон залуу авьяас xelex нарын шинэ тоглогчид багийн тактикийн гүнд гайхалтай уусаж, ямар ч нөхцөлд хамгаалалт, довтолгоогоо амжилттай хэрэгжүүлж байгаа нь MOUZ-ийг ялагдашгүй машинд хувиргажээ.
Чансааны шинэ төлөв: The MongolZ шилдэг 10-т байр сууриа бататгав
MOUZ-ийн ард сүүлийн саруудад хүчирхэг байгаа FURIA 2-р байрт бичигдэж байгаа бол Францын аварга Team Vitality, Team Spirit, Aurora зэрэг багууд шилдэг 5-д багтаж байна.
Харин манай үндэсний бахархал болсон The MongolZ IEM Beijing 2026 тэмцээний Гранд Финалд шалгарснаар дэлхийн чансааны топ 10-т (8-р байрт) байр сууриа улам бүр бататгаж, удахгүй эхлэх Singapore Major-ын өмнө өөрсдийн хүчийг дэлхийд дахин харуулав.
MOUZ багийн дараагийн сорилт удаан хүлээлгэхгүй. Тэд маргааш буюу 11-р сарын 11-нээс эхлэх $1,000,000-ын шагналын сантай BLAST Rivals 2026 Season 2 тэмцээнд G2 багийн эсрэг нээлтийн тоглолтоо хийнэ. Энэхүү тэмцээн нь оны хамгийн том шалгуур болох PGL Major Singapore-ын өмнөх эцсийн том сорилт болох юм.
Эх сурвалж: HLTV.org